Дзейны прэзідэнт ЗША Джо Байдэн памілаваў свайго сына Хантэра, які абвінавачваўся ў незаконным захоўванні зброі і нявыплаце падаткаў. Пра гэта гаворыцца ў заяве, апублікаванай на сайце Белага дома.
«Я падпісаў указ пра памілаванне майго сына Хантэра. З дня ўступлення на пасаду я сказаў, што не буду ўмешвацца ў прыняцце рашэнняў Міністэрствам юстыцыі, і стрымаў сваё слова, нават калі назіраў за тым, як майго сына выбіральна і несправядліва падвяргаюць пераследу», — заявіў Байдэн.
Прэзідэнт ЗША сцвярджае, што Хантэра «выбралі» для пераследу праз іх роднасныя сувязі і пад ціскам яго палітычных апанентаў, аднак судовы працэс «быў заражаны грубай палітыкай», і гэта прывяло да судовай памылкі.
«Спрабуючы зламаць Хантэра, яны спрабавалі зламаць мяне — і няма ніякіх падставаў лічыць, што на гэтым спыняцца. Хопіць», — гаворыцца ў заяве Байдэна.
Удакладняецца, што Байдэн-малодшы атрымаў памілаванне за ўсе злачынствы, «якія ён здзейсніў ці мог здзейсніць або ў якіх браў удзел у перыяд з 1 студзеня 2014 года да 1 снежня 2024 года», уключаючы тыя, па якіх яму выставілі абвінавачанні.
«Я спадзяюся, амерыканцы зразумеюць, чаму бацька і прэзідэнт прыйшоў да такога рашэння», — рэзюмаваў Джо Байдэн.
Адзначым, раней ён заяўляў, што не будзе выносіць рашэнне пра памілаванне сына.
Абраны прэзідэнт ЗША Дональд Трамп адрэагаваў на рашэнне Байдэна, назваўшы яго «злоўжываннем» і парушэннем правасуддзя.
«Ці распаўсюджваецца памілаванне, дадзенае Джо Хантэру, на закладнікаў 6 студзеня (грамадзян ЗША, якія абвінавачваюцца ў штурме Капітолія 6 студзеня 2021 года. — Заўв. рэд.), якія ўжо шмат гадоў знаходзяцца ў зняволенні?» — напісаў Трамп у сацсетцы Truth.
Нагадаем, у чэрвені прысяжныя ў ЗША прызналі Хантэра Байдэна вінаватым па трох пунктах справы пра незаконнае валоданне зброяй, у тым ліку ў ілжывых паказаннях для яе набыцця.
Акрамя гэтага, Байдэну-малодшаму таксама выставілі абвінавачанні ў нявыплаце падаткаў на суму не менш за 1,4 млн даляраў. У верасні ён сам прызнаў віну па ўсіх пунктах.
Па абодвух абвінавачаннях яму пагражаў буйны турэмны тэрмін.