Мінчука пакаралі штрафам за тое, што ён не падняўся падчас гімна на стадыёне, расказала «Вечернему Гродно» суддзя суда Ленінскага раёна Гродна Алена Пятрова. Здарэнне адбылося ў 2023 годзе.
Мінчук прыйшоў на спартыўны матч на стадыён і на трыбуне падчас афіцыйнай цырымоніі слухаў дзяржаўны гімн Беларусі седзячы. Суд вырашыў, што тым самым ён парушыў устаноўленыя заканадаўствам патрабаванні. Яму прызначылі штраф — 15 базавых велічынь (555 рублёў у 2023 годзе).
Такія паводзіны, паводле суддзі, належаць да «правапарушэнняў экстрэмісцкай скіраванасці»: за незаконныя дзеянні ў дачыненні да дзяржаўных сімвалаў прадугледжаная адказнасць паводле арт. 24.54 КаАП. Санкцыя артыкула — штраф да 15 базавых велічынь. То-бок у гэтым выпадку мінчуку далі максімальнае пакаранне.
Акрамя таго, Пятрова паведаміла, што з пачатку гэтага года толькі суд Ленінскага раёна Гродна разгледзеў 304 справы паводле арт.19.11 КаАП пра распаўсюд «экстрэмізму».
Нагадаем, два гады таму менавіта суд Ленінскага раёна Гродна аштрафаваў футбольнага заўзятара на 480 рублёў за непавагу да дзяржсімвалаў Беларусі: ён таксама не падняўся са свайго месца, калі перад матчам зайграў дзяржаўны гімн.