Мінскі абласны суд 16 кастрычніка ў 11.00 пачне разгляд крымінальнай справы заснавальніка тэлеграм-канала NEXTA Сцяпана Пуцілы і яго экс-калег: Яна Рудзіка і Рамана Пратасевіча.
Для разбіральніцтва над блогерамі выдзелілі памяшканне суда Мінскага раёна па адрасе вул. Маякоўскага, д. 119а.
З трох абвінавачаных толькі Раман Пратасевіч знаходзіцца ў Беларусі. Напярэдадні ён адказаў на некалькі пытанняў прапагандысткі Ксеніі Лебедзевай.
— Існуе вельмі шмат меркаванняў наконт таго, раскаяўся я, не раскаяўся, шчыра гэта ці не. Я што магу сказаць?! Абсалютная большасць людзей, якія пішуць розныя негатыўныя каментары, і блізка не маюць паняцця, што адбываецца насамрэч, што гэта наогул такое. Безумоўна, у кожнага ёсць сваё меркаванне, але я ўсё-такі стараўся заўсёды і стараюся далей быць чалавекам справы, а не слова. Я даказваю, што сапраўды прызнаў свае памылкі і перагледзеў свой погляд на многія рэчы. Я даводжу гэта справай. Далёка не ўсё з’яўляецца публічным. Меркаванняў можа быць колькі заўгодна, але я стараюся даводзіць усё не прыгожымі словамі, а перш за ўсё ўчынкамі.
На пытанне, што б Пратасевіч сказаў двум іншым абвінавачаным па справе, ён адказаў, што, «напэўна, нічога».
— Асабіста для мяне даўным-даўно ўжо ўсё зразумела пра гэтых людзей, — сказаў экс-галоўрэд NEXTA.
У судзе 16 лютага Раман Пратасевіч сказаў, што «гатовы маральна і псіхалагічна да любога рашэння».
— У поўным аб’ёме згодны з выстаўленымі мне артыкуламі Крымінальнага кодэкса, — сказаў абвінавачаны супрацоўнікам дзяржСМІ.
Нагадаем, усім траім інкрымінуюцца наступныя артыкулы:
- распальванне сацыяльнай варожасці (ч. 3 арт. 130 КК Беларусі);
- арганізацыя масавых беспарадкаў, навучанне і іншая падрыхтоўка асоб для ўдзелу ў іх (ч. 1 і ч. 3 арт. 293 КК Беларусі);
- арганізацыя групавых дзеянняў, якія груба парушаюць грамадскі парадак і спалучаныя з відавочным непадпарадкаваннем законным патрабаванням прадстаўнікоў улады, навучанне і іншая падрыхтоўка асоб для ўдзелу ў іх (ч. 1 і ч. 2 арт. 342 КК Беларусі);
- публічныя заклікі да захопу дзяржаўнай улады, акту тэрарызму, іншых дзеянняў, скіраваных на нанясенне шкоды нацыянальнай бяспецы Рэспублікі Беларусь (ч. 3 арт. 361 КК Беларусі);
- стварэнне экстрэмісцкага фарміравання і кіраўніцтва ім (ч. 1 арт. 361−1 КК Беларусі);
- паклёп і публічная абраза прэзідэнта Рэспублікі Беларусь (ч. 2 арт. 367, ч. 2 арт. 368 КК Беларусі).
Акрамя таго, Пуцілу і Рудзіку ў розным спалучэнні інкрымінуецца здзяйсненне наступных злачынстваў:
- змова з мэтай захопу дзяржаўнай улады неканстытуцыйным шляхам (ч. 1 арт. 357 КК Беларусі);
- фінансаванне экстрэмісцкай дзейнасці (ч. 2 арт. 361−2 КК Беларусі);
- дыскрэдытацыя Рэспублікі Беларусь (арт. 369−1 КК Беларусі).
Сцяпана Пуцілу таксама абвінавачваюць у арганізацыі дзейнасці тэрарыстычнай арганізацыі (ч. 1 арт. 290−5 КК Беларусі).
Нагадаем, расследаванне супраць Сцяпана Пуцілы і Яна Рудзіка Следчы камітэт вёў у фармаце спецыяльнай вытворчасці, яно доўжылася менш за два тыдні.
