Авіякампанія «Белавія» абвясціла промаакцыю з распродажам білетаў па ўсіх рэгулярных напрамках. Купіць білеты па зніжаных тарыфах можна толькі адзін дзень — 27 снежня. А вось даты падарожжа могуць быць у калідоры ад 12 студзеня да 25 сакавіка 2023 года, паведамляе прэс-служба авіяперавозчыка.
Пад акцыю трапілі ўсе напрамкі, куды яшчэ лётае беларуская авіякампанія, акрамя Туркменістана. Цэны — ад 49 да 199 еўра ў абодва бакі з улікам падаткаў і збораў:
- 49 € - Масква, Санкт-Пецярбург;
- 99 € - Екацярынбург, Казань, Калінінград;
- 149 € - Тбілісі, Батумі, Кутаісі, Сочы;
- 199 € - Ташкент, Астана, Стамбул, Дубай, Ерэван, Баку.
Купіць акцыйныя білеты можна як у абодва бакі, так і ў адзін. Яны прадаюцца на сайце кампаніі і ў мабільнай праграме. Тэрмін паміж білетамі «туды» і «назад» не павінен перавышаць адзін месяц. Білет мусіць выкарыстоўвацца ў адпаведнасці з чарговасцю маршруту: калі ён не быў выкарыстаны на першым участку, то анулюецца.
Колькасць білетаў па тарыфе «Прома» абмежаваная, але можна камбінаваць з іншымі тарыфамі, калі, напрыклад, у адзін з бакоў засталіся толькі білеты па поўным кошце або вярнуцца назад пасажыр збіраецца пасля 25 сакавіка.
Пры гэтым на ўвесь камбінаваны білет будуць распаўсюджвацца правілы тарыфу «Прома». А менавіта: акцыйныя білеты нельга вярнуць, абмяняць, унесці ў іх змены. Вяртанне сродкаў у выпадку адмовы ад палёту магчымае толькі ў выпадку хваробы пасажыра або членаў сям'і, якія едуць з ім, ці забароны яму на ўезд у краіну.