Інстытут Роберта Коха (RKI) разаслаў выпадкова выбраным жыхарам Германіі лісты з укладзенымі купюрамі па пяць еўра. Гэта было зроблена, каб стымуляваць людзей узяць удзел у даследаванні «Здароўе ў Германіі» — тым, хто на гэта пагодзіцца, прадугледжаны дадатковы бонус у памеры дзесяці еўра, піша Bild.
RKI разаслаў агулам 180 000 такіх лістоў па 300 гарадах і муніцыпалітэтах ФРГ, атрымальнікі былі выбраныя з рэестра насельніцтва з дапамогай «навуковай працэдуры выпадковага падбору». Гэта было зроблена, каб стымуляваць людзей узяць удзел у даследаванні «Здароўе ў Германіі». Для кожнага, хто пагодзіцца на ўдзел, прадугледжаны дадатковы бонус у памеры дзесяці еўра.
Аднак, грунтуючыся на досведзе, інстытут мяркуе, што каля 150 000 адрасатаў не возьмуць удзелу ў даследаванні: яны альбо не заўважаць ліст, альбо праігнаруюць яго.
Нямецкая асацыяцыя падаткаплатнікаў (BdSt) раскрытыкавала падыход RKI, патрабуючы тлумачэнняў у сувязі з такім марнаваннем дзяржаўных сродкаў.
«Выкарыстанне так званых стымулаў для заахвочвання ўдзелу ў даследаваннях — звычайная практыка і падрабязна прааналізаваная ў метадалагічных даследаваннях», — заявіла ў адказ на гэта прадстаўніца RKI.
Інстытут імя Роберта Коха — федэральны інстытут Германіі па вывучэнні інфекцыйных захворванняў і непераносных хваробаў, размешчаны ў Берліне, у раёне Вэдынг. Гэта адна з цэнтральных навукова-даследчых установаў Германіі, яна падпарадкоўваецца непасрэдна Федэральнаму міністэрству аховы здароўя.